فلسطين العراق افغانستان الصومال السودان النيجر ......الخ

احداث غزة الاخيرة كشفت حاجات كتير
مثلا لقيت في لجنة الاغاثة في نقابة الاطباء حسابات تبرعات لدول تانية
السودان ،الصومال ، العراق
الى حد ما عارفين القلق اللي في المناطق ده
لقيت كمان حساب للنيجر
النيجر ،ايه النيجر ده بقى مش عارف

دورت على النت لقيت مجاعه وبؤس وفقر

اللي صعبانة عليه اكتر افغانستان

برضه دولة محتله

تتعرض للقتل والتدمير

وبرضه من غير حس ولا خبر

حتى المسكينة مالهاش حساب للتبرعات في لجنة الاغاثة
احنا المفروض نساعد كل دول

كل دول هيمسكو في رقبتنا يوم القيامة
صحيح فلسطين ستبقى في القلب

لكن كل دول محتاجين مساعدتنا

كمان لا تنسوهم في دعائكم

يا ترى مين تاني في القائمة واحنا مش حاسين ؟؟

اخبار عن النيجر

http://www.islamway.com/Basateen/niger/pages/main.php

لنشر بانرات عن النيجر

http://www.islamway.com/Basateen/niger/pages/spread.php

ملحوظة : اللي بيعرف يعمل موضوع البانر ده يا ريت يعملنا حاجه عن افغانستان

عشرة واجبات لنصرة فلطسين

1- نصر الله تعالى في أنفسنا بالتزامنا بمنهج الله وإقامة الفرائض والشعائر الإسلامية؛ كلٌّ في نفسه وفي بيته وفي بيئته المحيطة به، وكذلك الاجتهاد في ذكر الله كثيرًا، وفي تلاوة القرآن والارتباط بالله عز وجل في كل أحواله، قال تعالى: ﴿يَا أَيُّهَا الَّذِينَ آمَنُوا إِذَا لَقِيتُمْ فِئَةً فَاثْبُتُوا وَاذْكُرُوا اللهَ كَثِيرًا لَعَلَّكُمْ تُفْلِحُونَ (45) وَأَطِيعُوا اللهَ وَرَسُولَهُ وَلا تَنَازَعُوا فَتَفْشَلُوا وَتَذْهَبَ رِيحُكُمْ وَاصْبِرُوا إِنَّ اللهَ مَعَ الصَّابِرِينَ (46)﴾ (الأنفال).

2- القنوت والدعاء في الصلوات وبخاصة في صلاة الليل، وفي النصف الأخير منه على وجه الخصوص؛ حيث يتنزل الحق سبحانه وتعالى وينادي: "هل من سائل فأعطيه".

3- تنمية عاطفة الأخوة بينه وبين إخوانه المجاهدين، تلك العاطفة التي يجتهد أعداء الإسلام في إضعافها وإضعاف الرابطة العقدية بين المسلمين وشغل كل بلد بهمومه الوطنية؛ حتى لا يلتفت إلى نصرة إخوانه، قال تعالى ﴿إِنَّمَا الْمُؤْمِنُونَ إِخْوَةٌ فَأَصْلِحُوا بَيْنَ أَخَوَيْكُمْ وَاتَّقُوا اللهَ لَعَلَّكُمْ تُرْحَمُونَ﴾ (الحجرات: ١٠)، وقال تعالى ﴿إِنَّ هَذِهِ أُمَّتُكُمْ أُمَّةً وَاحِدَةً وَأَنَا رَبُّكُمْ فَاعْبُدُونِ﴾ (الأنبياء: ٩٢).

وأخرج الشيخان أنه صلى الله عليه وسلم قال: "الْمُؤْمِنُ لِلْمُؤْمِنِ كَالْبُنْيَانِ؛ يَشُدُّ بَعْضُهُ بَعْضًا"، كما أخرج مسلم أنه صلى الله عليه وسلم قال: "مَثَلُ الْمُؤْمِنِينَ فِي تَوَادِّهِمْ وَتَرَاحُمِهِمْ وَتَعَاطُفِهِمْ مَثَلُ الْجَسَدِ؛ إِذَا اشْتَكَى مِنْهُ عُضْوٌ تَدَاعَى لَهُ سَائِرُ الْجَسَدِ بِالسَّهَرِ وَالْحُمَّى"، وقد قال صلى الله عليه وسلم: "من لم يهتم بأمر المسلمين فليس منهم".

4- الجهاد بالمال: وهو في حق المسلم غير القادر على مباشرة القتال بنفسه، والذي لا يملك الذهاب إلى غزة وفلسطين، أولى وأهم أنواع الجهاد؛ فهو جهادنا هنا في مصر وفي سائر بلادنا العربية والإسلامية، وجهاد كل مسلم في أنحاء المعمورة.

5- نشر القضية والتعريف بها في البيت وفي العمل وفي الشارع وفي كل مكان بحيث يكون لها الأولوية في حديث الناس؛ باعتبارها قضية إسلامية، وباعتبار الصراع ليس بين حماس كفصيل إسلامي مجاهد وبين الكيان الصهيوني فحسب، وإنما هو صراع بين المشروع الإسلامي الذي كلَّفنا الله تعالى بحمله والمشروع الاستعماري الذي يريد إذلال أمتنا وتركيعها لتستسلم للصهاينة ونترك طريق العزة والتحرير.

6- تعريف الأجيال الناشئة من أبنائنا وبناتنا بأصل القضية، وأنها قضية احتلال صهيوني لأرض الإسلام، واغتصاب ظالم للديار والأموال، وأن تحرير هذه الأرض المباركة أمانة في عنق كل مسلم، وواجب شرعي يسأل عنه كل مسلم؛ حتى ينشأ الجيل الجديد مدركًا الأبعاد الحقيقية للقضية الفلسطينية، ومن ذلك تشجيع الطلاب على عمل اللوحات الجدارية ومجلات الحائط التي تُعرَّف بالقضية وتشرح أبعادها الدينية والتاريخية.

المقاطعة للسلع والبضائع الصهيوأمريكية؛ فهذه إحدى الصور المُهمِّة للجهاد بالمال التي يجب الاهتمام بها دون تهوين أو تهويل من شأنها، وهي تتجاوز مجرد الإضرار- ولو على المدى البعيد- بالاقتصاد الصهيوني المدعوم من تلك المؤسسات، إلى إحياء معاني الثقة بالنفس لدى الأمة بالتخلص من العادات الغربية في المأكل والمشرب والملبس، وتشجيع المنتج الوطني والإسلامي، وتحقيق الاكتفاء الذاتي.


8- المشاركة الإيجابية في الفعاليات والأنشطة المؤيَّدة لحق الشعب الفلسطيني ومقاومته الباسلة في الدفاع عن الأرض وعن المشروع التحريري؛ بما في ذلك المظاهرات والمسيرات والوقفات والكتابة في الصحف والمجلات وتوزيع الكتب والمطويات التي تشرح القضية والمشاركة في المنتديات الإلكترونية لدعم صمود وكفاح الشعب الفلسطيني.

9- إطلاق أسماء القادة والشهداء الفلسطينيين على الشوارع وتسمية المواليد بأسمائهم ووضع صورهم ووصاياهم في المنازل.

10- إعلاء روح الجهاد في النفس بقراءة آيات وأحاديث الجهاد وتفسيرها ومعرفة فضل الشهادة والشهداء، ونشر قصص الاستشهاد والتذكير بها باستمرار.

ارقام الحسابات للتبرع

لجنة الاغاثة والطوارئ بنقابة الاطباء
بنك فيصل فرع القاهرة حساب رقم : 212051
بنك قناة السويس فرع الدقي حساب رقم 21090/1
باسم اتحاد الاطباء العرب

جامعة الدول العربية حساب رقم 7777777
بنك مصر الدولي

أو على حساب رقم 90002914 / 10 البنك التجاري الدوليأو إيداع مباشر في البنك برقم حساب 0 / 1 / 21090 بنك قناة السويس ـ الدقي
الهلال الاحمر المصري
حساب فلطين في بنك القاهرة
00305010008384
00306010001181

افلا يتدبرون القرآن ؟؟

_________________________________________





ترجمات معاني القرآن الكريم من على موقع

مجمع الملك فهد لطباعة القرآن الكريم

http://www.qurancomplex.com/

http://www.islamway.com/SF/quran/

وداعا عم موسى

فاكرين عم موسى ، واحد من الاتنين اللي انا قالبتهم عشان موضوع الشقة وعملنا حركة شقى عمري مع بعض
من كام يوم جالي تليفون
صوت واحد بيبكي بحرقة
عم موسى مات يا نائل ، معرفتش اقوله ايه
افتكرت اتقابلنا ازاي
اتقابلنا على قهوة في وسط البلد
من ساعتها واحنا التلاتة مع بعض
رحنا كل حتة مع بعض واتقالبنا كتير
فاكر كويس لما كان بيكلمني ويقولي نزلت الحاجه الجديدة بخصوص الشقة على النت اقوله لا لسه والله يا عم موسى ، يروح مديني كلمتين في جنابي ، اروح اجري احط الحاجات على البلوج على طول
او لو عندنا معاد في المحافظه ولا الموقع او أي حتة وانا مرحتش
افضل مستني مكالمتة وافضل اجهز في الاسباب اللي هقولهاله
كلنا كنا بنحبه ونحترمه
كان هو اللي بيحركنا ، كان عامل زي الدينامو
كان ارشيف الحركة ، عنده صورة من كل كلمة اتنشرت وكل مقال اتكتب وكل حديث تليفزيوني اتزاع
اكتر واحد فينا جري على الشقة بس يا خسارة متهناش بيها

لما الشقق خلصت وشقته دخل فيها ميه ، كان خلاص تعب ومقدرش يروح يقعد فيها

الله يرحمك يا عم موسى
فاكر كمان لما كان يفضل يحكيلي على الحاجات اللي كان بيعملها لما كان عضو في النقابة

عشان كان فيه شبه من انور السادات كنت دايما اهزر معاه اقوله سيادة الرئيس المؤمن عم موسى
كنت افضل اقوله ان شاء الله هييجي اليوم ونقعد كلنا في الشقق الجديدة ونفتكر الايام ده
بس للاسف يا عم موسى
ممكن يحصل ونروح نتقابل في الشقق الجديدة بس لوحدنا
بس مش هننساك ابدا ، كل واحد هيروح يقعد في شقته لازم يدعيلك ويقرالك الفاتحه على كل المجهود اللي انت عملته ده

كلمة اخيرة اقولها لهشام رضا رئيس مجلس ادارة بيتشو امريكان اللي احنا واخدين فيها الشقة
لازم تجهز حاجه تقولها لما عم موسى يسالك عن الشقة بتاعته يوم القيامه
الله يرحمك ويغفرلك ويجزيك عنا كل خير

نسألكم الدعاء

en francais

Je n’ai écrit pas depuis longe temps ,je ne sais pas pourquoi ,
aujourd’hui j’ai une examen de septième niveaux a la cours ,c’est la raison j’écris cette post
je pense posting en français est très bonne idée
je crois que personne du les policiers de Ministère de l'Intérieur ou sécurité de l'état ne comprennent pas le français
ou même le personne que transfére les nouvelles de mon blog au ma famille
mais a la meme temps , il y a une problem,il n’y pas beaucoup de gens que peux lire française ,personne vas visiter mon blog
aucun problème , le gens que ne peuvent pas lire francias ,ne méritent pas lire mes posts

ana EL RAMZ
heheheheheheheheheh

يوم الاحد امام حي البساتين

الى كل الناس اللي حاجزة في بيتشو امريكان سيتي

احنا رايحين حي البساتين يوم الاحد 3/2/2008

الساعة 11 صباحا

الموضوع نايم موووت ولازم نحركه شويه

مش محتاج اقول قد ايه مهم الناس تيجي

2007

اول السنة اللي فاتت 2007

قلت اعمل بقى اختراع كده واعلق اهداف السنة على الحيطة عشان تفضل قدامي

علقت التلات ورقات دول

صحيح اي واحد دخل الاوضه بتاعتي شبعني تريقه

وطبعا شايفين التعليقات المكتوبة عليها

بس معلش العظماء اللي زيي لازم يستحملو الناس العاديين

المهم عملت ايه بقى في الاهداف الجباره ده

الجواز ،طبعا زي منا ،لا تعليق مني او منكم لو سمحتم

رخصة العربية اسهل حاجه فيهم معملتش اي محاولة حتى شوية السواقة اللي كنت بعرفهم نسيتهم

الفرنساوي رغم انه الحاجه الوحيدة اللي مش باينلها اي فايدة على المدى القصير ولا البعيد

بس من اكتر الحاجات في حياتي اللي بذلت فيها مجهود ووقت وفلوس

مش عارف ليه

المفروض الواحد لما يحقق الهدف يشيل الورقة بتاعتها

بس 2008 بدات ولسه الورق متعلق

الزمالك فوق الجميع

المشهد الاول

هيه الشوكة اللي الاخ ده ماسكها فيها تلات سنون ليه ؟؟

المشهد التاني

الف مبروك لكل جمهور الزمالك المخلص الوفي
الف مبروك للنجم الساحلي الشقيق

يا ريت كل فرقه ملهاش لازمه تقعد في بيتها عشان مش عايزين صداع

واالي مش قد اللعب باسم مصر يلعب على قدو

مش ناقصين فضايح

_____

الصورة التانية اهداء من صديق بورسعيدي مخلص

وانا اضفت ليها لمستي الشخصية

د. نبيل فاروق ، شكرا

مش عارف ابدا منين عشان اتكلم عن العالم السحري بتاع نبيل فاروق ، بتاع روايات مصرية للجيب

مين فينا مكتبته مفيهاش عدد من الاعداد صغيرة الحجم ذات الشكل المحبب للنفس ، اللي كانت دايما متهمة من الاباء انها بتاعت اطفال ، مش عارف ليه
مين فينا مشاركش ادهم في مغامرة من مغامراته في عالم المخابرات والمنظمات الاجرامية في سلسلة رجل المستحيل

مين فينا محلش الغاز او مسافرش تلات اربع كواكب او ورجع القرن التاسع عشر او راح القرت التلاتين مع نور الدين محمود في ملف المستقبل

كوكتيل 2000


وارزاق



وحاجات تانية كتير
فاكر كويس اول دخولي للعالم ده ، فاكره كويس اول عدد ، العدد رقم خمسة في سلسلة رجل المستحيل (الجليد الدامي ) كنت في خمسه ابتدائي ،كمان فاكر كويس ان انا كنت في اسكندرية




ومن ساعتها لحد دلوقتي وانا مابطلتش قراية ، دخلت عالم روايات مصرية للجيب الساحر ولسه مخرجتش منه
بالعكس انا رجعت اشتري كل الاعداد تاني عشان احتفظ بيها ، وبقراها تاني بكل استمتاع
مش هنسى الراجل اللي كان جنب مدرستي الاعدادي بيبيع القصة ب 60 قرش ، او تديلو واحده وتاخد منه واحده تانية وتدفع 30 قرش
مش هنسى حصص الرسم لما كننا نتلم عشان نقرا مع بعض ونتخانق عشان فيه حد بيقرا بسرعه وواحد بيقرا بالراحه
د.نبيل فاروق في عدد من اعداد كوكتيل 2000 في اخر العدد كان بيقول انه نفسه يكون اثر في أي حد من الشباب تاثير ايجابي
لا يا دكتور انت اثرت في جيل كامل ، بجد من المحيط الى الخليج ، اتربينا على قصصك واتعلمنا قيم كتير ورواياتك اثرت فينا اكتر من ما تتخيل
عرفنا يعني أيه قوة وايجابية واجتهاد وتفوق وعزة وكرامه ووطنية واخلاق وتدين واخلاص ووفاء وانتماء ، وثقافة وعلم ومتعه ، ايوه كل ده وحاجات تانية كتير
عرفنا يعني ايه قراية ، يعني تمسك كتاب في ايدك
احب اقولك ان انت ما اخدتش حقك ادبيا
كفاية انت زي ما بتقول عملت شخصيات معروفة على مستوى العالم العربي كله
انا شفتك مرة واحده في حياتي في معرض الكتاب من فتره طويله
نفسي اقابلك تاني واقعد اتكلم معاك ، نفسي تشوف الموضوع ده وتعلق عليه

تحياتي لادهم صبري ونور الدين محمود ، مع اني بحب سلسلة ملف المستقبل اكتر من سلسله رجل المستحيل ، بس بحب ادهم اكتر من نور مش عارف ليه

انا انتمي لهذا العالم

عالم روايات مصرية للجيب
تحياتي د. نبيل فاروق
تحياتي روايات مصرية للجيب
تحياتي للمؤسسة العربية الحديثة

عيد ميلاد فؤاده

انهارده عيد ميلاد فؤاده
اكيد السنة الايام ده بقت تلات اربع شهور بس
مش ممكن تكون عدت سنة كامله
واحد بس افتكر عيد ميلادها وبعتلي هدية كمان
بعتلي الاغنية بتاعت الفيلم ،فيلم شئ من الخوف
الف شكر يا باشا ، تعيش وتفتكر

كتبت حاجات كتير وفي مواضيع مختلفة
مكنتش فاكر ان انا هكتب كل ده
كمان عن طريقها اتعرفت على مجموعة شقى عمري وعملنا حمله ضد تراست وبيتشو امريكان

ارخم حاجه حصلت هيه القلق اللي فؤاده عملته في البيت عندنا
وده خلاني ماكتبش حاجات كتير كنت عايز اكتب عنها
بس انا راضي عن فؤاده
ربنا يخليها ليه

شكرا لكل الناس اللي زارتني وعلقت عندي
وشكر خاص ل
زينب شهيدة
محمد مصر هيه امي
Important person in my life
الشخص اللي بيحبني

عمر & سلمى

حصريا على فؤاده

مش بجميع دور العرض

طبعا سلمى بنت ايمن اخويا الكبير انتو عارفينها وشوفتوها قبل كده في اناوسلمى ، وعمر ابن نهى اختي الصغيرة

الرمز بيشجع الزمالك

تحديث

--------------------------------------------------------

امبارح لما نزلت العلم كنت عامل حسابي اكتب الموضوع انهارده ، بس بصراحه نفسي اتسدت ، مكنتش فاكر ان الماتش يطلع من طرف واحد بالطريقه ده
نفسي اعرف ليه الفرق الصغيره اللي زي الاهلي والترسانة والمقاولين بتيجي قصاد الزمالك وتدافع ويموتو نفسهم قدام الجون بتاعهم بالطريقه ده وكل هدفهم يطلعو باقل نتيجه
مع ان ده فرصة الفرق الصغيره اللي زي ده يطلعو في التلفزيون ويلعبو قصاد جمهور كبير
حتى الكورة في مصر مش هتتقدم طول مالفكر ده موجود
فرقه مغلوبة وبتضيع وقت والجمهور طالع فرحان جدا ان الماتش طلع اتنين بس
المفروض يلمو الفرق المغمورة ده ويخلوها تلاعب بعض بعيد عن الزمالك ، مش أي حد معدي يلاعب الاسياد عادي كده

انا زعلان ،اتنين بس ، هارد لاك يا زمالك ، مبروك الاهلي

ماما

ماما في مرة من الخناقات بتاعت المدونة قلتلها يا ماما انا هكتب عنك ، قالتلي طيب اكتب عني

مش عارف ابدأ منين

ماما شافت مني كتير

طول عمري متعب تاريخي الدراسي كان اسود ، خلصت الدراسة دخلت في مشاكل الشغل ، قعدت شوية واشتعلت ورحت قاعد تاني واشتغلت واشتغلتلهم في موضوع السياسه ده

وفي الاخر ختمتها و رحت داخل السجن

طول عمري تاعبهم معايا

دايما بقول لماما ان انا مدي لحياتهم طعم ، دايما شاغلهم ومن غيري الحياة هتكون ممله جدا

احساس جميل ومهم جدا ان يكون واحد على الاقل في الدنيا انت اهم حاجه في حياته
وماما هيه الانسان الوحيد اللي عاملي اشباع للرغبة ده

مش عارف اقولكم قد ايه بستمتع باتهام اخواتي وابويا شخصيا بانها بتعاملني احسن منهم

ولا لما ابويا يشوفها وهيه بتتحايل عليه عشان اكل وهو يقولها سيبيه هو ضيف
ولا لو شافها مثلا بتقطعلي حته الفرخه بتاعتي

عشان كده هيه كمان اهم انسان في حياتي
الانسان الوحيد اللي غيابه بيعملي ارتباك ومش بعرف اعيش من غيرها

هيه طيبة وحنينة قوي

وجودها دايما بيطمني

ساعات بحب ارخم عليها وانا بصحيها من النوم، وانا بحول التليفزيون وهيه بتتفرج
ولا لو حصل وزعلتها ومرضتش تصالحني ، افضل قاعد جنبها وافضل اغنيلها
وطبعا اللي عارف صوتي يعرف انها مش بتقاوم وبتصالحني عل طول

فعلا الامومة هيه العاطفة الوحيده الحقيقية في الدنيا ده هيه ، ولا صداقة ولا حب ولا اخوة ولا أي حاجه
هيه الامومة وبعدها الابوة

الحاجه الوحيدة في الدنيا اللي عندها قدرة تدي في اتجاه واحد
تدي بس من غير متاخد ، عطاء متواصل مش متوقف على الاخذ
حاجه غريبة ، مجرد ما الواحد يفكر في حاجه يلاقيها اتعملت
مش فاهم ازاي حد في عز ما انت مزعله يشوف انت عايز ايه ويعملهولك
عشان كده انا دايما من انصار المرأه وشايف دورها اهم من الراجل ميت مرة


انا بحب ماما قوي وانا طول الوقت بحاول ارضيها و الحمد لله هيه راضية عني
ما فيش غير موضوع واحد هو اللي بيوتر علاقتنا دايما ، هو موضوع السياسة ، وطبعا دلوقتي موضوع الجواز

انا بحبك يا ماما

فؤاده ده بنتي

نفس اللي حصل في (اللي عملت حسابه ) بس بصورة وضغط وزعل اكبر ، الخبر وصلهم من اكتر من مصدر

وللمرة التانية لقيت نفسي مش عارف اعمل ايه

اخويا الصغير قالي انت عارف كل مشكلتك ايه : مشكلتك انك نفسك تكون مشهور
يا خوفي يكون عنده حق

المهم لما قالولي لازم تلغيها من على النت خالص رديت عليهم رد زي ساعات كتير مش عارف جبته منين
قلتلهم فؤاده ده بنتي ، مقدرش ألغيها

فعلا أنا بحب المدونة ده ، بحب فؤاده ، فعلا مديه لحياتي طعم ، ومقدرش أعيش من غيرها

حتى لو مش احلي البنات
ومش مهمة عند أي حد
ومزعله الناس مني
وممكن في يوم من الايام اتأذي بسببها

بس فؤاده ده بنتي

عام في حياتي

بالنسبالي ، كانت سنة جميلة ، احلى سنة في حياتي

2006

بعد مافضلت سنة كاملة تقريبا عاطل في 2005 ، الحمد لله اشتغلت في اول السنة في وظيفة حلوة

دخلت السجن ،وطبعا ده كانت تجربة مختلفة ، بس كانت ممتعة ومفيدة ،والحمد لله مطولتش وانتهت على خير،وكانت نقطة تحول في حياتي

صعوبتها كانت على اهلى اكتر منها عليا

علاقتي باهلي كويسة ، وبأمي بالذات ،علاقة ممتازة وفوق الوصف ، باستثناء فترة السجن وموضوع السياسة هية الحاجة الوحيدة اللي بتضايقها مني ، يا رب السنة اللي جاية تفضل راضية عني كده

على مستوي الصداقة ، عرفت ناس ، وخسرت ناس ، وبعدت عن ناس ، وقربت من ناس

خسرت واحد من اكتر الناس اللي حبتهم في حياتي
بعدت عن ناس كانو اصحابي من ثانوي
ناس كانو اصحابي وصداقتنا زادت وقويت زي صديقي اقرب واحد ليا اللي اكيد عارف نفسه
ناس كنت عارفهم وقربنا من بعض اكتر زي زينب
ناس عرفتهم وبقو حاجه مهمة في حياتي زي شرقاوي اللي بقى قريب مني جدا
وصديقة جديدة ، من النوع اللي وجودها في حياتك يخليها احلى واجمل

طبعا ده غير الناس الجميلة اللي انا عرفتها في الشغل وفي السجن

السنة اللي فاتت اكتر سنة قريت فيها في حياتي ، قريت كتب وروايات ومقالات، في كل حاجه وعن كل حاجه

بالرغم ان انا بعتبر 2006 اجمل سنة في حياتي لغاية دلوقتي ، بس فيه اكتر من حاجة مضايقاني

اول حاجه مضايقاني هية مستوي التدين عندي ، حققت في 2006 اقل مستويات على الإطلاق من 6 سنين تقريبا ، في كل حاجه ،القرآن ،الذكر ، الفجر ، الصيام ،القيام ، في كل حاجه .

تاني حاجه ان 2006 فضل برضه عام من غير حب وارتباط

كمان السنة اللي فاتت كان المفروض اكمل دورات الفرنساوي اللي بدأتها 2005 ، بس مكملتش للأسف ، برضه كان المفروض العب رياضة ، بس بطلت السنة ده


طبعا كل الحاجات على المستوى الشخصي بعيد عن المستوى العام زي الحرية والديموقراطية وحقوق الانسان ولبنان وفلسطين وكل الحاجات ده

اتمنى السنة اللي جاية ، علاقتي بامي وابويا تفضل جميلة ، اضبط موضوع التدين ، اتجوز مش مهم بقى موضوع الحب عشان خلاص قربت اموت ، اكون اكتر حركة ونشاط،

انا دايما عندي خلل في استغلال وتنظيم الوقت ، عايز اضبط الموضوع ده ، كمان عايز اشيل موضوع الحلول الوسط و الحلول المؤقتة من حياتي
وطبعا اتمنى الزمالك يكسب ويكون احسن

في نهاية السنة ، اقدر اقول ان بصفة عامة حياتي في تحسن مستمر الحمد لله ، اكيد فيه احسن من كده ولسه جوايا حاجات كتير لازم تتغير ، وهو ده اللي انا عايز اعمله السنة الجاية ، ان شاء الله

وكل سنة وانتم طيبين

انا وسلمى

كان يوم جميل ، انا و سلمى في جنينة الحيوانات ، سلمى اللي انا بحبها موت ، روح قلبي ، نور عيوني ، بحبها

سلمى بعد ما عملت وش القطة

لحظات من السعادة الصافية

شايفين سلمى، واضح انها شخصية قيادية زي عمها

في مجموعة تانية من الصور ، هنزلها في البوست الجاي ، انتظرونا

عند النهاية ، نظرة الى الماضي

من شوية كنت بتفرج على الحلقة الاخيرة من مسلسل السندريلا ، مشهد اثر فيه جامد ، سعاد حسني خلاص كبرت وتعبت وفي اخر لحظاتها ، كانت بتفتكر مشاهد من حياتها وهيه بتدمع ، مشاهد من افلامها ، اصحابها ، الناس اللي اثرو في حياتها ، طفولتها ، اخواتها ، ازواجها ، الناس اللي حبيتهم ، الناس اللي حبوها ، الناس اللي كانو بيقفو معاها في الشدة ، والناس اللي كانت بتقف معاهم في شدتهم ،الناس اللي باعوها واتخلو عنها ،مواقف صعبة ومواقف حلوة ، الحاجات اللي عملتها ، مشاهد متتالية فيها مشاعر جميلة

فعلا مشوار طويل وحياه مليانة

قلت لنفسي ، يا تري الواحد لما يكبر ويعجز ويقعد يعمل زيها ، ويفتكر الذكريات
يا ترى هلاقي حاجه افتكرها
حاجة تستاهل
اصدقاء
ناس وقفو جانبي وناس وقفت جنبهم
حياة مليانة فيها حاجة تساوي
ناس حبيتهم وحبوني
هكون راضي عن حياتي
هلاقي حاجه تخليني احس بالسعادة وانا بفتكرها
هلاقي حاجه عملتها واقول فعلا الواحد عمل حاجه في حياته وعمره مضعش
ولا العكس ، مش هلاقي أي حاجه من الحاجات ده

عايز اعترف ان انااكتر حاجه خايف منها في حياتي هية النهاية التانية ده

ايها السادة الأحرار الرجالة ، سيبو الستات في حالهم

من كام يوم كنت بصلي التراويح ، دخلت الجامع ، لقيت مجموعة من الستات والبنات بيصلو جوه الجامع في الجزء المخصص للرجالة ،عاملين كام صف في الاخر وبيصلو شكلهم كان حلو جدا ، ويشرح القلب ، محاولتش اسأل عن السبب ، السبب المنطقي والواضح ان جزء الستات مليان والزياده دخلو معانا ،كلام جميل جدا ، بس طبعا ايه اللي حصل ، الكلام ده معجبش الساده الأحرارالرجالة وبدأو يتكلمو ، امام الجامع قالها صريحة ، يا جماعه الستات هيصلو معانا وهيدخلو من باب والرجاله من باب ، قالها صريحه عشان يقفل الموضوع ،عشان عارف الناس بتفكر ازاي في أي حاجه ليها علاقه بالمرأه ، بس على مين ،برده الهمهمات مستمره ، تلاقي واحد من الساده الأحرار الرجالة يقولك بكل حرقه وحماس وقرف واشمئزاز، ايه ده يا عم ، طيب ميصلو في البيت ، والتاني يقولك ايه ده ،هو على ايام الرسول كان بيحصل كده ،مع ان الجامع واسع جدا وفي فرق كبير بين الرجالة والستات ،لكن ازاي ،برده متضايقين جدا ، على فكره ، الناس ده ناس عاديين ، لا هم سلفيين ، ولا ملتحين ،ولا متشددين ولا محسوبين على التيار الاسلامي من قريب ولا من بعيد ، ناس عادية خالص بتصلي في الجامع ،يعني مش كفاية على الستات المتشددين اللي بيظلموها باسم الدين ، لا ، كمان الناس العادية (قصدي الرجالة العادية )
انا متأكد ان الاغلبية ميعرفوش ايه هو الحكم ، ولا على ايام الرسول كان بيحصل كده ولا لأ ، ولا يفرق معاهم أي حاجه ، طيب ايه الموضوع، الموضوع ان في ناس فجأه ضميرها الديني بيصحى (او هم بيتهيألهم ان ده ضميرهم الديني )، وقدرتها على الاعتراض بتظهر ، لما يكون الموضوع متعلق بالستات ، بس انت دخل الستات في الموضوع ، تلاقي كل الرجالة بتتكلم وبتفتي وليها رأي، يفضل الواحد فيهم ساكت ساكت محدش بيسمعلو صوت في أي موضوع ولا أي حاجه ، وفجأه تلاقيه عامل ثورة عشان كام ست عملو صف في جزء الرجالة
تاني يوم رحت اصلي ، الكام صف بتوع الستات اختفو ، اضايقت وحسيت ان الست تعرضت لفصل جديد من فصول الاضطهاد ، وحسيت بالندم ان انا متكلمتش لما كان الساده الأحرار الرجالة عاملين الأعتراض بتاعهم ، بس انا قلت اكيد مش هسكت،بصفتي واحد من كبار انصار المرأه ، بس مش هتكلم انهارده ، خليها بكره لما اتأكد ايه الموضوع
تالت يوم دخلت الجامع ملقتش برضه صفوف الستات ، قلت لا بقى ، لازم اعرف ايه اللي حصل وثورة السادة الأحرار الرجالة عملت ايه ، رحت على الشيخ بتاع الجامع ، قلتله انتو منعتو الستات انها تصلي هنا ، قالي لا ده الموضوع بس ان جزء السيدات كان فيه اصلاحات عشان كده كانو بيصلو معانا وخلاص الجزء بتاعهم اتصلح ورجعو فيه ،وخلص الموضوع على كده
ارتحت وقلت كويس ، عشان انا كنت ناوي اكبر الموضوع .(محدش يسألني كنت هكبره ازاي عشان انا مش عارف

وطبعا اكيد مش عايزاي حد يستعبط ويتهمني ان انا بشجع على الاختلاط مثلا ، كمان في ناس هتحس ان انا ببالغ ومكبر الموضوع ،يمكن، انا ساعات بحس بكده ، بس حسيت ان انا عايز اكتب الكلمتين دول ، فكتبتهم ، بس

انا ليه كنت (عبد )؟؟

انا ليه كنت (عبد )؟؟
دايما بيحيرني الشعب المصري ، دايما بسأل نفسي السؤال ده ، الشعب ده ليه طالع كده ، الموضوع ده بالنسبة ليه لغز كبير ، ازاي الناس طلعت كده ؟ ازاي قدرت تحافظ على العبودية طول الفترة ده ، زي مبيقول عليها جمال حمدان ، اسوأ استمرارية على مر التاريخ ،
انا هحكيلكو حكاية صغيرة ،ممكن فيه ناس تقول ان انا مكبر الموضوع ، او ده مش زي ده ، بس انا شايف ان الحكاية ليها علاقة مباشرة بموضوع الاستعباد ده ، وانتو احكمو
انا اشتغلت فترة في الكويت ، في شركة طلبت ناس عشان يشتغلو في مشروع هناك ،( من الاول كده لازم اقول ان الادارة بالكامل كانت مصرية ، عشان مظلمش الكوايتة )المهم ، كنا عشرشباب زي الورد ، من اعمار مختلفة ، اسر مختلفة ، ظروف اجتماعية مختلفة ، مستويات تعليم مختلفة ، محافظات مختلفة ، ظروف مادية مختلفة ،تفكير مختلف ، طموحات مختلفة، طبائع مختلفة ، في اللي متجوز والخاطب والعازب ، يعني باختصار عينة عشوائية ممتازة، تقريبا ممثلة لكل مصر ، وللأسف الشديد ، والغرابة في نفس الوقت ، العشرة (وانا منهم طبعا) اتنازلو ، واشتغلو في ظروف زبالة ، ومرتب قليل ، ومعاملة مش كويسة ، وسكتو ، واتقهرو ، وشالو الطين ، واشتغلو حاجات ملهاش أي علاقة بالوظيفة اللي رايحين عليها ، و اتظلمو، ومحدش فتح بقو ، ولا حد اعترض لا قال انتو بتعملو ايه ، ...الخ .
السؤال بقه ، لييييييييييييييييييييييييييه ؟؟ ليه احنا عملنا كده ، صحيح الحجج جاهزة : البلد وقعت يا شباب ، هنروح مصر نقعد على القهاوي ، ده فترة وهتعدي (على فكره ، لغاية دلوقتي الفترة لسه معدتش ) ، احسن من مافيش ، لازم نستحمل ، يعني نرجع مصر والناس تقول ان احنا فشلنا ، الى اخره من الحجج ده .

بس مهما كانت الحجج ، ومهما كانت الظروف ، مش ممكن يكون ده رد فعل العشرة ،يكون بالطريقة ده ، بالذل ده ، بالعبودية ده ، كنا فعلا عاملين زي العبيد والله مش تعبير مجازي ، احنا كنا عاملين زي العبيد بجد ،حتى المكان اللي كنا بنشتغل فيه كان عامل زي السجن يمكن احقر من السجن كمان .
انا ليه كنت عبد ؟؟ انا فاكر ظروف مش عارف استحملتها ليه ،ورضيت عنها ازاي ، صحيح انا دلوقتي اتغيرت وبقيت (حر ) بس المشكلة ليه انا كنت كده ، هو( الديفولت) بتاع الشعب المصري هو العبودية ولازم نعمل تغيير في السيتنج عشان يكون حر ،
طبعا انا مستعد اشتغل واتعب مفيش مشكلة ، بس يكون في مقابل ، وتكون المعاملة كويسة .
طبعا اكيد في ناس هتقول يا عم متكبرش الموضوع ، عبودية ايه اللي بتتكلم عليها ده بس ، انت هتعمل فيها احمد عرابي
بس والله ده عبودية انا بس عايزكو تتخيلو اللي يعمل كده مع شركة لا راحت ولا جت ، هيعمل ايه مع الحكومة وامن الدولة .طبعا عارفين الاجابة من غير تخيلات .
المشكلة كمان ان المجموعه ده من اوساط مادية كويسة ، وكمان متعلمين تعليم عالي ، امال لو من الناس اللي مش لاقية تاكل فعلا ، او من اللي مش متعلمين اصلا ، كانو عملو ايه ؟؟
يا ترى ايه السبب ،ممكن تكون الجغرافيا زي بيقول جمال حمدان ؟ ممكن يكون في حاجه في الميه ؟ ممكن يكون في حاجه في الهوا ، ممكن يكون في حاجه في الجينات ؟ مش عارف .

وحشتينا يا فؤاده

انا بقيت من المدونين

خلاص بقى عندي مدونة ،وهقول كل اللي جوايا ، اخترت اسم جميل ،اسم فؤاده اللي بعتبرها رمز للمقاومة ، بس مش عارف ابدأ بايه ، مش عارف هبدأ ازاي ، كنت كتبت عن تجربة اعتقالي ، بفكر أبدأ بيها ،هية صحيح هتكون متأخرة شوية ،بس ممكن تكون بدايةكويسة ،طبعا قرار انشاء المدونة جه متأخر ، كالعادة زي أي حاجه في حياتي ،بس مش مشكلة ،المهم ان انا عملتها

الاول عايز اقول ان انا هكتب بالعامية ، انا العربي الفصحى عندي كويس ، بس انا برتاح اكتر لما اكتب بالعامية ،ماشي ؟
لو سألتوني متوقع ايه للمدونة ، هقول ان انا مش عارف ، كل الاحتمالات ممكنة
ممكن تكون مالهاش أي لازمة : احتمال .
ممكن محدش يسمع عنها : وارد .
ممكن أزهق وابطل كتابة بعد كام مرة : جايز .
ممكن تكون مملة : مستحيل لأن انا انسان ظريف .
ممكن تطلع حلوة وتكسر الدنيا: يا ريت .
ممكن تعملي مشاكل مع الأمن : ربنا يجعل كلامنا خفيف عليهم .

ممكن تعملي مشاكل في البيت مع ابويا وامي : اكيد طبعا .
ممكن تزعل ناس مني : اتمنى ميحصلش .

اكتر حاجه خايف منها ان اكتب كام مرة وابطل ، لأني بعمل الموضوع ده كتير في حياتي ، بس المرة ده انا عايز اكمل المشوار ومش هقف ، ان شاء الله .
سلام